ज़ख्मन वोॖथ क्रोल
याद प्योॖम रोवमुत ओल

जनवरी नमतस मंज़ तिछ़ लार करॖॖख
कॖशुर बटॖ त्रावनोवुख ओलॖ
तापॖ च़नज्यन पान छावनोवुख
कॖशुर बटॖ त्रावनोवुख ओलॖ।

अल्लाह हु अकबर नारॖ दिवान कोचव द्रायि लश्कर
च़मेयि लुख कूनन कुनिची नॖ केंह खबर
च़ोपॖर्य ओस खूनरेज़ी हुंद माहोल
कॖशुर बटॖ त्रावनोवुख ओलॖ। 1.

रलिव च़लिव नत गलिव ॶऽस्य यछ़ान
असि गछ़ि कशीर बटव बॖगॖर बटनैव सान।
अमिकुय सुबह प्यठ शाम ताम वायान ढोल
कॖशुर बटॖ त्रावनोवुख ओलॖ।2

बटनी बटनी दोदय्य मस
च़े केहै करुन छुय दालि गडवस
नासज़हुक ॶऽस अति प्रथ गरि बोल
कॖशुर बटॖ त्रावनोवुख ओलॖ।3

ड्रमस मंज़ पान थॖव्योन खटिथ
तथ अन्दर ति गोल्यव त्रोवुस सीनॖ च़टिथ
कुनि पासॖ न कांह बचाव नय बचावन वोल
कॖशुर बटॖ त्रावनोवुख ओलॖ।4

हक हमसायव ति कॖर बेवफाई
ऋशिवारि निशि बटन कॖरख जुदॖई
महोबत तॖ खलूस कॖम्यॖ सना गोल
कॖशुर बटॖ त्रावनोवुख ओलॖ।5

गोॖडॶ बेहुरमती पतॖ आरस पय्ठ चीरख
मोल तॖ नेचुव यिकॖवटॖ कुलिस अलंन्दॖय त्रॖविख
यिम छा इन्सान यिना छुय आदम ब्योल
कॖशुर बटॖ त्रावनोवुख ओलॖ।6

यारन यार शेहलोव सेमंज़ वते
गण करिथ कॖत्य त्रॖविख व्यथे
पथनो खश करनस रूद कांह ज़ोल
कॖशुर बटॖ त्रावनोवुख ओलॖ।7

नय इजाज़त हय्योत माजि नय कुनि गरू द्वारस
सॖरी लगिमॖत्य ॶस्यॖ कुनि तरफॖ पान बचावऩस
सारिनय मशिथ गयि साध संत बेयि ऋशिमोल
कॖशुर बटॖ त्रावनोवुख ओलॖ।8

राथ ताम यिम असि वनान ॶऽस्यॖ पननी
अज़ किथॖ गयि ॶस्यॖ गॖरज़ॖनी
यि छा हकीकत किनॖ मखोल
कॖशुर बटॖ त्रावनोवुख ओलॖ।9


जिंदगी हुन्द सफर किथॖ करव तय
गछ़व कोॖत करव क्या यी नॖ पय
ओॖश हारान हारान ॶछन गव
अरखोल
कॖशुर बटॖ त्रावनोवुख ओलॖ।10

बानहालि गोॶल पथ कुन त्रॖविथ
ब्रोंठ कुन द्रायि ॶछॖ वटिथ
जोॖम्म वॖतिथ ड्राइवर वोॖन वोॖथ अछ खोल
कॖशुर बटॖ त्रावनोवुख ओलॖ।11


सॶरी अख अकिस मुदय गंडिथ वुछान
कांह न कंसि केंह बॶविथ ह्यकान
सारिनय पननि पननि रंगॶ होल
कॖशुर बटॖ त्रावनोवुख ओलॖ।12

जोॖम्म वॶतिथ सॶरी आयि छकॖरनॖ
लॖग्य केंह नालन केंह लॖग्य डकरन
केंह पुरखू, नगरोटा, मुट्ठी तॖ मिशरीवोल
कॖशुर बटॖ त्रावनोवुख ओलॖ।13


गर्मॶ क्रायि अन्दर सॖरी ॶस्यॖ बदहाल
गमव तॖ फिकिरव ओसुख वोलॖमुत नाल
बनैवॖ तमाशा बटॖ ज़न ओस कावॶ यनिवोल
कॖशुर बटॖ त्रावनोवुख ओलॖ।14

तरफातन तच़ि तावि लॶगिख अनज़ान
सेकि सहरावन कनि मॖदानन ओॖश हारान
केंच़न रॶव्य शुरिॖ केंच़न रछनवोल
कॖशुर बटॖ त्रावनोवुख ओलॖ।15

गोलेॖव तॖ बमव निशि नजात प्रॖविथ
यति सोरफव तॖ बिच टोॖपव नी सॶविथ
यिथॖ कॖन्यॖ ज़ख्मन नो ब्यूठ क्रोल
कॖशुर बटॖ त्रावनोवुख ओलॖ।16

शुरैॖन रोव असुन गिंदुन तॖ तजरुबॖ बुज़ुर्गन
मजबूरन दोॖह कडिख मंज़ गॶव गानन
कल पथ कुन थल रुवनच तॖ थजिओल
कॖशुर बटॖ त्रावनोवुख ओलॖ।17

अथॖ छॖन्यॖ न्यथनॶन्यॖ द्रायि गरव
पयनो गछ़व कोॖत किथॖ तय क्या करव
त्रॖविख कछ़कर, वजि बेयि कनवोल
कॖशुर बटॖ त्रावनोवुख ओलॖ।18


कटॖ ख्यलिॶ ज़न बेहनॖविख ननिस तापस
पुशॖ क्या त्रावहव होजंस तॖ रादस
तापॖ क्रायन मंज़ हनि हनि पान ज़ोल
कॖशुर बटॖ त्रावनोवुख ओलॖ। 19


नय ओस कैंह वुरुन नय कैंह वथरुन
किथॖ तय क्या गव कथन लोॖगॖ फिरुन
ननिस तारक नबस बोव यी ओसा कोल
कॖशुर बटॖ त्रावनोवुख ओलॖ।20

ज़िन्दगी हंज़ि किताबि रूद्यॖ वर्क फिरान
पानस पानय टैंटस मंज़ रूद्यॖ गुदरुन बावान
डेकॖ लान्युक वर कूताह च़ोल
कॖशुर बटॖ त्रावनोवुख ओलॖ।21

गोलेन हंज़ टासराय ॶऽस वुनि कनन
मरन वाल्यनॖ हंदिस शुमारस नो कांह सनन
यिमनॖय वोॶन तिमव दियुत कनॖ डोल
कॖशुर बटॖ त्रावनोवुख ओलॖ।22

अण्यॖ दांद ज़न ओस सरकार
नय हेॖच़ख साम नय कांह गिरिफ्तार
कुनि कांह ना ओस बोज़नवोल
कॖशुर बटॖ त्रावनोवुख ओलॖ।23

गरन हॖन्दयॖ गरॖ करिख वुजारॶ
नॶद्यमर गामस आव नॖ कांह बटॖ त्रावनॖ
रूदुख नॖ पथ कुन बाख त्रावन वोल
कॖशुर बटॖ त्रावनोवुख ओलॖ।24

कुस डुबॖडास न्यूख करिथ ऋशिवारि
खोफि खोदा मशरिथ फश दितुख शमशेरि दारि
कति सना साद संत पीर फकीर तॖ बटमोल
कॖशुर बटॖ त्रावनोवुख ओलॖ।25

कूताह वनव तॖ कूताह लेखव गव क्या
ज़खमन क्रॖल्य तुलिथ हावव तॖ बावव कया
पतिम्यव सतथव (70) वरियव प्यठॖ वोत चवान यि ज़हरॖ गोल
कॖशुर बटॖ त्रावनोवुख ओलॖ।26

पोतुस मोहरा सारिन्यॖ त्रॖवॖख डेकस
माइग्रंट (migrant) सोंदर कॖरख बट्स
बटन हंदिस हालस ना कांह सननवोल
कॖशुर बटॖ त्रावनोवुख ओलॖ27

पॖऽच़ि ना वकीलन, कलाकारन तॖ कलमकारन
अदीबन, शॖयिरन तॖ उस्तादन
नय त्रोवुख प्रेम नाथ भट्ट नय लसॶ कोल
कॖशुर बटॖ त्रावनोवुख ओलॖ28

गरॖ त्रॖविथ बटन॒ कोॖर इसतादॖ पान
सरस्वती वरदान छस पहचान
थोद वोथुन वॖस्यॖ पेॖथ छु ज़ाननवोल
कॖशुर बटॖ त्रावनोवुख ओलॖ29

यिना ओस गोडन्युक च़लुन
यमि ब्रोंठ सति लटि प्योमुत च़लुन
थव विश्वास "सन्तोष" कॖल्यॖ यी सकोल
कॖशुर बटॖ त्रावनोवुख ओलॖ30

-सन्तोष तिकू "सन्तोष"